गांधी रोड हादरला! ‘बिंदी घर’च्या आड महिलांचा छळ; व्हिडिओ ब्लॅकमेलिंग रॅकेटचा पर्दाफाश, तिघांविरुद्ध गुन्हा दाखल
अकोला:शहराच्या मध्यवर्ती गांधी रोड परिसरात घडलेल्या धक्कादायक घटनेने संपूर्ण शहर हादरून गेले आहे. ‘बिंदी घर’ नावाच्या कॉस्मेटिक दुकानाच्या आड महिलांना जाळ्यात ओढून,त्यांच्यावर लैंगिक अत्याचार आणि मानसिक शोषण केल्याचा गंभीर आरोप समोर आला आहे. या प्रकरणात व्हिडिओ ब्लॅकमेलिंगसारखी घृणास्पद पद्धत वापरण्यात आल्याचे तक्रारीत स्पष्ट झाले आहे. गर्दीच्या बाजारपेठेत महिलांसाठी सुरक्षित मानल्या जाणाऱ्या ठिकाणीच असा प्रकार घडल्याने नागरिकांमध्ये तीव्र संताप व्यक्त होत आहे.
मिळालेल्या माहितीनुसार, आरोपी सुरुवातीला दुकानात आलेल्या महिलांशी मैत्रीपूर्ण संवाद साधत विश्वास संपादन करत होते. ‘नवीन कॉस्मेटिक साहित्य आले आहे’ किंवा ‘ऑर्डर पाठवायची आहे’ अशा कारणांनी मोबाईल नंबर घेतले जात. त्यानंतर सतत कॉल आणि मेसेज करून महिलांना पुन्हा दुकानात येण्यास भाग पाडले जात होते. काही वेळा दुकानात कोणी नसल्याची संधी साधून असभ्य वर्तन केल्याचेही तक्रारीत नमूद आहे.
तक्रारीनुसार, महिलांना दुकानात बोलावून गुपचूप व्हिडिओ चित्रीकरण करण्यात आले. हे व्हिडिओ सोशल मीडियावर व्हायरल करण्याची धमकी देत बदनामीचा धाक दाखवण्यात आला. काही पीडित महिलांना मानसिक दबावाखाली ठेवून त्यांच्या इच्छेविरुद्ध कृत्ये करण्यास भाग पाडल्याचा आरोप आहे.
एका पीडित महिलेच्या तक्रारीनंतर अकोला पोलिसांनी तातडीने गुन्हा दाखल केला आहे. प्राथमिक तपासात तिघे आरोपी सहभागी असल्याचे निष्पन्न झाले असून, मोबाईल डेटा, कॉल रेकॉर्ड्स, सीसीटीव्ही फुटेज आणि डिजिटल पुराव्यांच्या आधारे सखोल तपास सुरू आहे. आणखी काही पीडित महिलांनी पुढे येण्याची शक्यता पोलिसांनी व्यक्त केली आहे.या घटनेनंतर अकोला शहरात महिलांच्या सुरक्षेचा प्रश्न पुन्हा एकदा ऐरणीवर आला आहे. दोषींवर कठोरात कठोर कारवाई करावी, बाजारपेठांमध्ये सुरक्षित वातावरण निर्माण करावे, अशी जोरदार मागणी नागरिक आणि सामाजिक संघटनांकडून होत आहे.
