बार्शीटाकळी पोलिसांच्या सतर्कतेमुळे टळला मोठा अनर्थ; रेल्वे ट्रॅकवर पडलेल्या तरुणाचे वाचवले प्राण
बार्शिटाकळी:
अकोला जिल्ह्यातील बार्शिटाकळी रेल्वे स्टेशनजवळ पोलिसांच्या तत्परतेमुळे एका १९ वर्षीय तरुणाचे प्राण वाचले आहेत. रेल्वे ट्रॅकवर पडलेल्या या तरुणाला अवघ्या दोन मिनिटांच्या फरकाने मृत्यूच्या दाढेतून बाहेर काढण्यात पोलिसांना यश आले.
नेमकी घटना काय?
आज दिनांक ०२/०२/२०२६ रोजी रात्री ८:१० च्या सुमारास, बार्शिटाकळी रेल्वे स्टेशनपासून साधारण १०० मीटर अंतरावर शिवणीकडे जाणाऱ्या रेल्वे ट्रॅकवर एक तरुण पडलेला होता. याच दरम्यान अकोल्याहून एक एक्सप्रेस ट्रेन येत होती.
गस्तीवर असलेले बार्शिटाकळीचे पोलीस एएसआय विलास नाफडे, पोलीस शिपाई सागर बंगाळे आणि चालक शोहेबौद्दीन सिद्दीकी यांना अंधारात सदर तरुण ट्रॅकवर असल्याचे दिसून आले. परिस्थितीचे गांभीर्य ओळखून या पोलीस पथकाने तत्काळ धाव घेत त्या तरुणाला रेल्वे ट्रॅकवरून बाजूला केले.
केवळ २ मिनिटांचा अवधी
हा तरुण ट्रॅकवरून बाजूला होताच अवघ्या दोन मिनिटांत तिथून अकोला एक्सप्रेस वेगाने निघून गेली. जर पोलिसांनी वेळीच हालचाल केली नसती, तर या तरुणाचा जागीच मृत्यू झाला असता.
तरुण दिव्यांग असल्याची माहिती
बचाव करण्यात आलेल्या तरुणाचे नाव नितीन संदीप जाधव (वय १९ वर्षे, रा. रेडवा) असे आहे. पोलिसांनी दिलेल्या माहितीनुसार, सदर तरुण बोलू आणि ऐकू शकत नाही (दिव्यांग आहे). सुखरूप सुटका केल्यानंतर पोलिसांनी, बार्शीटाकळीचे पोलीस निरीक्षक प्रवीण धुमाळ यांच्या मार्गदर्शनाखाली,या तरुणाला त्याच्या नातेवाईकांच्या स्वाधीन केले आहे.
पोलिसांनी दाखवलेल्या या धाडसाचे आणि सतर्कतेचे सर्वत्र कौतुक होत आहे.
previous post
